Testu bankua

Emakumea eta kirola. Garai batean pentsa ezina zen bi hitz hauek elkarren eskutik joan zitezkeenik. Eta ez gabiltza orain dela ehun urteren inguruan hizketan, hurbilagoko garaiez baizik. Eta, gaur egun ere, oraindik, bide luzea falta da pareko oztopoei aurre egin eta mugak erabat gainditzeko. Emakume hauek badabiltza horretan, badabiltza bi hitz hauek, beste batzuen artean, batera joan daitezen lanean.

Behean irakurriko dituzun biografiak emakume kirolarienak dira, garai eta kirol ezberdinak elkarbanatzen dituzte bertan. Lan honen helburua kirolari hauei ahotsa eman eta bakoitzaren kirol ibilbidea azaltzeaz gain, bide horretan izandako oztopoak identifikatu eta emakume kirolari izateak suposatu dezakeena mahai gainean jartzea izan da.

Nahiz eta biografietan agertu ez, hainbat dira emakume hauek zeharkatzen dituzten gaiak: hilerokoa, amatasuna, kiroleko materiala eta abar. Orokorrean, kirolean bakoitzak bizi izan duen genero-desberdintasuna. Ama txarrak, mari-mutilak, bigarren mailako kirolariak... zerrenda luze bat osatu genezake beraien kirol ibilbidean zehar entzun eta sentitu izan dutenaren inguruan.

Beraz, emakume kirolarien kirol-ibilbidea da ondorengo lerroetan irakurriko duzuna. Oztopoak oztopo, bakoitzaren lorpen eta krisiak ageri dira bertan. Kirola gizonek gizonezkoentzako sorturiko zerbait izanik, espazioak hartuz eta emakumeen lekua borrokatuz heldu dira ondorengo emakumeak heldu diren lekura arte.

Ezagutu ditzagun hurbilagotik emakume kirolari hauen bizitza eta bizipenak.